خطة الإمارات تجاه جنوب السودان؟
كتب / شـان سـانتينـو
بجانب دعمها للدعم السريع عشان يستولي على السلطة في السودان الإمارات شغالة كمان في جانب تاني – بتحاول تغرق جنوب السودان في ديون وقروض ضخمة من النوع البستحيل تسددو لا بعد عشرين ولا حتى خمسين سنة،
كمان بتشتري الموارد مقدماً، يعني قبل ما تُنتج أصلًا.
الفكرة كلها إنو لو الدعم السريع استولى على الحكم في السودان حيكون عند الإمارات حليف استراتيجي جاهز في الشمال، وطالما إنو الدعم السريع حالياً بيقاتل عشان مصالح الإمارات في السودان، شنو البمنعو بكرة يقاتل عشان مصالحها في الجنوب؟
بالمعنى الواضح: الجنوب حيكون مجبر يحمي مصالح الإمارات بالوكالة، يعني الديون والقروض الكتيرة دي ما إلا فخ كبير، مدروس كويس، وممكن يكون خطر على الأمن القومي ومستقبل البلد، لأنو بخلق فقر، وبزرع صراعات جاية مع شمال الدعم السريع.
ولو الحكومة الحالية أو أي حكومة جاية حاولت تتعامل مع العقود دي بشوية وطنية، الإمارات ممكن تخلق صراع معاها عن طريق الدعم السريع.
سلفاكير عارف الحاصل، لكن مضغوط اقتصادياً وسياسياً، وخايف من الانهيار، فبيحاول يهرب لقدام، والواضح إنو ما مهم عندو الوضع في الشارع ولا الجوع ولا الحالة الاقتصادية، بقدر ما همه كيف يظل في الكرسي لأطول فترة ممكنة.
وفي النهاية، الأجيال الحالية والقادمة هي البتدفع ثمن لامبالاة الجماعة ديل.
